Wasu daga cikin jami’an gidan yarin sun samu raunuka sakamakon jifan da fursunonin suka yi musu yayin zanga-zangar.
Alfijir labarai ta rawaito Ɗaruruwan fursunonin da ke gidan gyaran hali na Jos a ranar Juma’a sun nuna rashin amincewarsu da shirin da hukumomin cibiyar suka yi na rage abinci sakamakon karin farashin kayayyakin masarufi.
Jami’in da ke kula da ciyarwar ya tara fursunonin ne domin sanar da su tattaunawar da ‘yan kwangilar da ke ba su abinci a kan karin farashin kayan abinci a kasuwa da shirin rage cin shinkafa daga sau hudu a mako zuwa sau biyu a mako.
Rahotanni sun ce wannan bayanin ya fusata fursunonin lamarin da ya haifar da zanga-zangar da suka yi yayin da suke jifa da duwatsu da wasu abubuwa masu hadari ga ma’aikatan cibiyar.
Da aka tuntubi Konturolan ‘yan sandan jihar Filato, Ibinule Raphael, wanda ya tabbatar da faruwar lamarin, ya ce fursunonin sun yi zanga-zangar ne sakamakon shirin da ‘yan kwangilar ke yi na ciyar na rage yawan shinkafar da suke ci daga hudu zuwa sau biyu a mako.
Ya kara da cewa a yayin da mai kula da gidan yarin ke kokarin isar da sakon dan kwangilar ga fursunonin, an yi ta fama da rikici domin sabon shirin cin shinkafa sau biyu a mako bai yi wa fursunonin dadi ba.
Ya ce, “To da safe kamar yadda na saba, na je tsakar gidan don in ga abin da ke faruwa a wajen. Na ga wani jami’i yana jawabi ga fursunonin, da na tambayi abin da ke faruwa, sai ya ce mini yana yi musu bayanin sakamakon tattaunawar da ya yi da dan kwangilar da ake biya ya kawo musu abinci a wannan watan.
“Ya ce dan kwangilar ya bayyana cewa ba zai sake ciyar da su shinkafa sau hudu a mako ba saboda tsadar kayayyaki a kasuwa kuma zai iya jurewa ta hanyar rage ta zuwa sau biyu a mako.
Don haka, lokacin da ya kira su da safiyar yau don ya bayyana musu abubuwa, ba su ji daɗi ba. Don haka, da aka sanar da ni, na ce masa ya ce su koma dakunansu, suka ki komawa.
“Don haka, a lokacin da suka tsaya tsayin daka, an saki wasu gwangwani na hayaki mai sa hawaye, kuma an yi harbin bindiga a iska don tilasta su shiga cikin dakunansu. Ta haka ne muka yi nasarar shawo kan lamarin. Kafin haka dai sun fara jifan ma’aikatan da duwatsu da sauran abubuwa.
“Wasu daga cikin ma’aikatan sun samu kananan raunuka sakamakon duwatsun da aka jefa musu amma babu fursunoni da suka samu rauni saboda an shawo kan lamarin.”
Cibiyar ta Jos tana da fursunoni 1,064 da suka kunshi maza 1,035 da mata 19. Daga cikin adadin wadanda ke jiran shari’a sun hada da maza 647 da mata 14. Yayin da fursunonin da aka yanke wa hukuncin sun kunshi maza 205 da mata hudu, fursunonin da ake yanke wa hukuncin kisa 131.
Domin Samun sauran shirye shiryenmu, Zaku iya bibiyarmu a
https://twitter.com/Musabestseller?s=09
https://www.facebook.com/profile.php?id=100089640289165
https://www.threads.net/@alfijirlabarai
https://www.youtube.com/@BestsellerChannel12
https://www.instagram.com/musa_bestseller?utm_source=qr&r=nametag
Ko a latsa nan don shiga Group Whatsapp na Alfijr Labarai 👇👇
https://chat.whatsapp.com/H3iC9eVfJI012LJzvCQn5V