An tayar da jijiyoyin wuya a zauren Majalisar Dokokin Kano, kan kudaden da gwamnatin jihar ta ware wa masarautu a karamin kasafinta na 2023.
Alfijir labarai ta rawaito takaddamar ta kaure ne a yayin zaman tantance kwarya-kwaryan kasafin kudi na Naira biliyan 24 da Gwamna Abba Kabir ya gabatar domin amincewar majalisar.
A yayin bibiyan kasafin ne ’yan majalisa suka diga alamar tambaya bayan da suka ga an ware masarautan Kano, Gaya, Rano da Bichi Naira miliyan 2.5 kowannensu, amma aka ware wa Masarautar Karaye Naira miliyan 50 a cikin kasafin.
A yayin hayaniyar ne shuugaban majalisar, Jibrin Falgore, ya bayyana wa mambobi cewa Masarautar Karaye ce kadai ta kare kasafin da aka ware mata a cikin Masarautar biyar da ke jihar.
Bayan bayanin da shugaban majalisar ya yi musu ne kurar ta lafa.
A karshen zaman dai, Majalisar ta amince da karamin kasafin kudin na karin Naira biliyan 24 a kan kasafin jihar na shekarar 2023.
Amincewar majalisar da kwarya-kwaryan kasafin da Gwamnan ya gabatar mata ya kara yawan kasafin jihar na 2023 zuwa biliyan 350.
A watan da ya gabata ne gwamnan ya gabatar da kwarya-kwaryan kasafin a gaban wa majalisar domin amincewarta.
Shugaban Masu Rinjaye kuma dan majalisa mai wakiltar Dala, Lawan Hussaini (NNPP) ya ce kwarya-kwaryan kasafin kudin zai ba wa gwamnatin jihar damar aiwatar da manyan ayyuka a bangaren ilimi da na kiwon lafiya.
Baya ga haka, gwamnatin za ta samu zarafin biyan kudaden giratuti da fanshon ma’aikatanta da suka yi ritaya.
Daily trust
Domin Samun sauran shirye shiryenmu, Zaku iya bibiyarmu a
https://twitter.com/Musabestseller?s=09
https://www.facebook.com/profile.php?id=100089640289165
https://www.threads.net/@alfijirlabarai
https://www.youtube.com/@BestsellerChannel12
https://www.instagram.com/musa_bestseller?utm_source=qr&r=nametag
Ko a latsa nan don shiga Group Whatsapp na Alfijr Labarai 👇👇
https://chat.whatsapp.com/H47OrRBUPHYEeNqV0vwlQp