Mutane 5 Sun Mutu 7 Sun Jikkata A Wani Hatsarin Mota Da Ya Rutsa Da Su

An tabbatar da mutuwar mutane biyar yayin da wasu bakwai suka jikkata a wani hatsarin mota da ya afku a hanyar Ore-Lagos a ranar Asabar.

Alfijir labarai ta rawaito jami’in hulda da jama’a na rundunar ‘yan sandan jihar Ondo, Funmilayo Odunlami-Omisanya, ta tabbatar da faruwar hatsarin a wata sanarwa da ta fitar ranar Asabar.

A cewar kakakin rundunar ‘yan sandan, hatsarin ya faru ne a unguwar Akinfosile na babbar hanyar da misalin karfe 4:30 na rana.

Ms Omisanya ta ce hatsarin ya rutsa da wata mota kirar Toyota Hiace Bus mai lamba Reg No FKG 405 FX kan hanyar zuwa Legas daga Akure, ta afka cikin daji.

Ta kuma bayyana cewa an kai wadanda suka jikkata zuwa Asibitin Alheri, yayin da aka ajiye wadanda suka mutu a dakin ajiyar gawarwaki da ke wannan asibitin.

Ta kara da cewa, “Yau da misalin karfe 04:30 na rana, a unguwar Akinfosile dake kan titin Ore/Lagos, ‘yan sanda sun samu rahoton cewa wata mota kirar Toyota Hiace Bus dauke da Reg No FKG 405 FX daga Akure a kan hanyar Legas yayin da take kan hanyarta ta yi mumunan hari in da ta shiga cikin daji.”

A cewarta, ana ci gaba da bincike don gano musabbabin hatsarin yayin da ake kokarin tuntubar iyalan fasinjojin da lamarin ya shafa.

Don haka, ta bukaci ‘yan uwa da su tuntubi ‘yan uwansu da suka tafi Legas daga Akure ranar Asabar don duba su,” yayin da ta shawarci “masu shakkun inda iyalansu suke da su kai ga ‘yan sanda a sashin Igbotako ta hanyar wannan waya mai lamba 07033285708 don karin bayani”.