AJALI: Rodin Aikin Gina Kwalbati Yayi Ajalin Yarinya 'Yar Shekara 8

Daga Aminu Bala Madobi

Yarinya ‘yar shekara 8 ta rasu bayan rodin aikin Kwalbati ya huda ma ta ciki a Kano

Wata yarinya ‘yar shekara takwas mai suna Siyama Idris ta rasu bayan ta haɗu da Iftila’in afkawa ramin aikin ginin Kwalbati a unguwar Tudun Wada, cikin ƙaramar hukumar Nassarawa

Wani ganau mai suna Abdulrashid Yusuf ya shaida wa manema labarai cewa lamarin ya faru ne a ranar Asabar a kusa da Makarantar Firamare ta Tudun Wada, in da ake ci gaba da aikin faɗaɗa hanyar gina magudanan ruwa a yankin.

Yusuf ya ce an aike yarinyar ne zuwa wani ƙaramin shago domin ta sayo abin buɗa baki (iftar), amma abin takaici sai hatsarin ya faru. A cewarsa, magudanar ruwan da ake ginawa tana da sandunan ƙarfe na rodi da aka bari a waje ba tare da an rufe su ba, kuma babu wata hanya ta musamman da masu tafiya a ƙasa za su ratsa sai ta wajen.

Ya ƙara da cewa mazauna yankin suna amfani da wata gadar katako ta wucin gadi da aka ɗora a kan magudanar ruwan domin ketarewa. A yayin da yarinyar ke ƙoƙarin ketare wurin kusa da aikin ginin, sai ta zame ta afka kan sandar ƙarfen da aka bari a waje.

“Sandar Rodin ba a rufe ta ba. Da ta fadi sai ta soke cikinta,” in ji shi. Ya ce yarinyar ta rasu nan take a wurin kafin ma a samu damar kai ta asibiti.

Mazauna yankin sun zargi rashin isassun matakan tsaro a wurin aikin ginin, suna masu cewa sandunan ƙarfe da aka bari a buɗe da kuma gefunan magudanan ruwa da ba a kulle ba suna barazana ga rayuwar masu tafiya a ƙafa, musamman yara.

Wannan lamari na zuwa ne kwanaki kaɗan bayan wani hatsari makamancin haka a ranar Juma’a, inda wani matashi mai suna Ibrahim Umar mai kimanin shekara 15 ya faɗa cikin wata magudanar ruwa a kan titin Badawa da ke kusa da Lamido Crescent bayan sallar Juma’a. Ya samu raunuka kuma dole ya karya azumi yayin da aka kai shi wani asibiti domin samun kulawa.