An Yanke Wa Mubarak Bala, Da Yayi Batanci Ga Annabi SAW Daurin Shekaru 24 A Gidan Yari
Kotun daukaka kara ta yanke hukuncin dauri na shekaru 24 a gidan kaso, bayan da ya amsa laifuka 18 da ake tuhumarsa da aikatawa a Kano.
Bala, wanda shi ne shugaban kungiyar ‘yan Adam ta Najeriya, an kama shi ne a gidansa da ke Kaduna a ranar 28 ga Afrilu, 2020 kuma aka kai shi Kano, inda aka kai kararsa na batanci da tsokana ga Annabi Muhammad SAW.
A baya dai ya wallafa kalaman batanci ga Musulunci, Allah da Annabi Muhammad a shafin Facebook, lamarin da ya harzuka musulmi.
An yi ta hayaniya akan a sake shi ko kuma a yi masa shari’a, inda masu fafutuka ke cewa bai da alaka da matarsa da lauyansa.
Amma da ya bayyana a gaban mai shari’a Farouk Lawan na babbar kotun Kano ta 4, Audu Bako sakatariyar a ranar Talata, Bala ya amsa dukkan tuhume-tuhumen da ake yi masa.
Da alkali ya tambaye shi ko ya san sakamakon laifin da ya yi, Bala ya amsa dukkannin abubuwan da ake tuhumarshi tun da farko.
Lauyan Bala, James Ibor, a baya ya yi kokarin shawo kan wanda ya ke karewa ya sauya rokonsa, amma ya dage cewa yana da laifi kan tuhumar da ake masa.
Sai dai lauyan ya bayyana takaici da fargaba a matsayin dalilan da suka sa wanda yake karewa ya amsa laifinsa, inda ya ce wanda yake karewa ya shafe shekaru biyu a gidan yari.
Amma Bala, wanda ya bayyana ba tare da tada hankali ba, ya daga hannu ya shaida wa kotu cewa yana da laifi kamar yadda ake tuhumar sa.
A cikin rokonsa na neman a yi masa sassauci, Bala ya ce manufar rubutun da ya yi a shafukan sada zumunta ba shine tada hankali ba. Don haka ya yi alkawarin ba zai sake maimaita irin wannan aika-aikar ba a nan gaba.
Da yake zartar da hukuncin, Mai shari’a Lawan ya yanke masa hukuncin daurin shekaru 24 a gidan yari.[lock][/lock]