Yadda Buhari Boss Mustapha Emefiele Suka Umarci CBN Ta Biya $6,230,000 Ga Masu Sa ido kan Zabe - In Ji EFCC

Tsohon shugaban babban bankin Najeriya reshen, Ogau Onyeka Michael, ya bayyana yadda tsohon maigidansa, Godwin Emefiele, ya buƙaci babban bankin ya biya dala miliyan 6,230,000 ga masu sa ido kan zabe na ƙasa da ƙasa ba bisa ƙa’ida ba.

Alfijir labarai ta rawaito a jawabinsa na ikirari a zaman da aka ci gaba da yi sauraron ƙarar, Mista Ogau ya bayyana cewa ya samu takarda a ranar 8 ga watan Janairu, 2023, inda aka buƙaci a biya kudaden, wanda Mista Emefiele ya riga ya amince da su.

Mista Ogau ya shaida a matsayin shaida na farko na hukumar yaki da cin hanci da rashawa a shari’ar da ake yi wa Emefiele a babbar kotun tarayya da ke babban birnin tarayya Abuja, Maitama, Abuja, ranar Litinin.

Ya kara da cewa takardar ta kuma samu amincewar sakataren gwamnatin tarayya na lokacin Boss Mustapha da shugaban Najeriya Muhammadu Buhari na lokacin.

Da take bayyana hakan a hukumance a ranar Litinin ɗin da ta gabata, Hukumar Yaƙi da yi wa Tattalin Arzikin Kasa Ta’annati (EFCC) ta bayyana cewa tsohon shugaban babban bankin yana fuskantar tuhume-tuhume 20 da suka hada da cin hanci da rashawa, haɗa baki, da laifin cin amana, zamba, da kuma samun kuɗi ta hanyar yaudara”.

Da yake ba da labarin abin da ya faru, Mista Ogau ya ce, duk wani buƙatun biyan kuɗi ana kai ta ga mai kula da reshe, kuma ofishinsa ne. Kuma a ranar, bukatar da aka ba shi a ofishinsa $ 6,230,000, kuma mataimaki na ofishin ya ja hankalinsa zuwa gare ta. Hakan ya fito ne daga sashin kula da ayyukan banki, kuma takardar na ɗauke da sa hannun darakta mai kula da harkokin banki, tare da umurtar mai kula da reshe da ya biya dala miliyan 6,230 ga ma’aikacin sakataren gwamnatin tarayya, mai ɗauke da suna da katin shaidar mutum.

“An bayyana cewa an biya kudin ne domin gudanar da zabe kuma a biya su tsabar kudi a naira kwatankwacin adadin da aka faɗa. Sannan ya bayyana cewa ma’aikatar kudi ta tarayya zata dawo da kudaden a kashi na biyu na shekarar 2023, takardar ta kuma bayyana cewa, da amincewar gwamnan babban bankin Najeriya na biyan kuɗin.

“Haka zalika, takardar ta samu amincewar sakataren gwamnatin tarayya a lokacin da kuma na shugaban tarayyar Najeriya na lokacin. Bayan na shiga cikin takardar kuma na gamsu da cewa ta cika abin da ake bukata, sai na mika ta ga shugaban sashin ayyukan banki don sarrafawa da kuma biyan kuɗi na gaba. Mista Williams, shugaban aiyuka na banki, ya hada kuma ya biya kudin a ranar 8 ga Afrilu, 2023, kuma an biya kudin. Zan iya tantance takardar domin ita ma tana ɗauke da sa hannuna,” ya kara da cewa.

Lauyan mai gabatar da kara, Rotimi Oyedepo, SAN, a yayin da yake kokarin gabatar da dukkan takardu shida a matsayin baje kolin, ya shaida wa kotun cewa biyu daga cikin takardun da ke da alaƙa da tsohon SGF da amincewar shugaban kasa, kwafi ne, don haka ya nemi ya mika sauran hudun, wadanda suka kasance na asali.

Don haka, ya roki kotun da ta bayar da lokaci don kawo sauran biyun kafin a ci gaba da shari’ar yayin da ya kuma bukaci kotun ta dage zaman na tsawon mintuna 30 domin a je harabar babban bankin na CBN a samu kwafin asali.

Sai dai Lauyan wanda ake ƙara, Mathew Bukka, SAN, ya ki amincewa da roƙon Mista Oyedepo, inda ya ce tun da an tsayar da shari’ar a ranakun 12 da 13 ga watan Fabrairu, ya bukaci a dage shari’ar zuwa ranar 13 ga watan Fabrairu.