Jam'iyyar APC Ta Bukaci 'Yan Sanda Da Su Kama Wasu Fitattun Mutane 16 Cikin Gaggawa A Kano

A wata sanarwa da ta fito daga jam’iyyar All Progressives Congress (APC) a jihar Kano, ya nuna yadda jam’iyyar ta aika saƙo ga rundunar ‘yan sandan Najeriya, domin kama wasu fitattun mutane 16 a jihar bisa zarginsu da tunzura jama’a a kan jam’iyyarsu ta shafukan sada zumunta.

Alfijir labarai ta rawaito wasikar mai kwanan wata 5 ga watan Janairu, 2024, mai dauke da sa hannun sakataren jam’iyyar APC na jihar, Ibrahim Zakari, ta bukaci rundunar ‘yan sandan Najeriya da ta kama mutane goma sha shida tare da gurfanar da su a gaban kotu kamar yadda jam’iyyar ta rubuta.

A cewar wasikar, jam’iyyar na da kwarin guiwar cewa dan takararta na gwamna, Dakta Nasiru Yusuf Gawuna zai bayyana a matsayin wanda ya lashe zaben gwamnan jihar da aka gudanar a watan Maris din 2023, kuma a kan haka ne jam’iyyar ta baiwa rundunar ‘yan sandan Najeriya izini la’akari da wasika a matsayin umarni.

Wasikar kamar haka: “A madadin Shugaban Jam’iyyar APC na Jihar Kano, muna rokon da a binciko mutanen da aka jera sunayensu a kasa tare da kama su nan take bayan hukuncin da Kotun Koli ta yanke a ranar Juma’a 12 ga Janairu, 2024, wadda za ta bayyana Dr. Nasiru Yusuf. Gawuna a matsayin mai nasara.

“Muna kuma rokon hukumar da ta gaggauta gabatar da kararraki tare da zarginsu da amfani da kafafen sadarwa na zamani wajen furta kalamai marasa dadi, da ke iya tada rikici da tunzura mutane kan gwamnatin APC.

Muna da gamsassun hujjoji akan rubuce-rubucen su. Za a aiko muku da sunan kotun da ya kamata ku gabatar da kararsu a lokacin da ya dace.

Salisu Yahaya Hotoro
Aliyu Dahiru Aliyu
Kabiru Sa’idu Dakata
Hon. Sunusi bature dawakin tofa
Nasiru Zango
Sufyan Safjamil Kabo
Hajiya A’in Jafaru Darmanawa
Alhajiji Nagoda

Hon Ibrahim Zakari

Ibrahim Zakari Zawaciki
Sani Musa Danja
Hon. Auwalu Lawan Aranposu
Sunusi Osca
Kwankwason Dakata
Ishak Abdul
Aminu Abdullahi Kima
Habu Tabule

“Za a aiko muku da adiresoshin gida da ofis na mutanen da aka lissafa, na gode.”

Kotun sauraren kararrakin zabe da kotun daukaka kara sun kori Gwamna Yusuf tare da bayyana Gawuna a matsayin wanda ya lashe zaben a baya.

Sai dai kotun koli ta yi watsi da hukuncin kotun zabe da kotun daukaka kara tare da tabbatar da Gwamna Abba Kabir Yusuf a matsayin zababben gwamnan jihar Kano.