Wata Sabuwar! Fada ya barke A lokacin da ake gudanar da Taron Kwamitin Amintattu na PDP

An gwabza fada a hedikwatar jam’iyyar PDP, inda ake gudanar da taron kwamitin amintattu na jam’iyyar (BoT).

Rikicin dai ya fara ne lokacin da aka hana Sunday Ude-Okoye, wani jigo a jam’iyyar damar halartar taron.

Jam’iyyar PDP dai ta shiga wani sabon rikicin shugabanci a daidai lokacin da Samuel Anyanwu da Ude-Okoye ke ikirarin zama sakataren jam’iyyar na kasa.

A watan Disamba 2024, kotun daukaka kara ta yanke hukuncin cewa Ude-Okoye ya maye gurbin Anyanwu a matsayin sakataren PDP na kasa.

Kwamitin zartarwa na shiyyar kudu maso gabas na jam’iyyar ta tsayar da Udeh-Okoye a matsayin wanda zai maye gurbin Anyanwu bayan ya zama dan takarar gwamna na jam’iyyar PDP a jihar Imo a 2023.

Anyanwu ya samu wasu umarnin kotu na hana tsige shi daga mukaminsa.

Sai dai a wani hukunci da ya yanke a ranar 20 ga watan Disamba, 2024, Ridwan Abdullahi, alkalin kotun daukaka kara, ya yi watsi da hukuncin da babbar kotun ta yanke, wanda ya hana a tsige Anyanwu, saboda “rashin cancanta”.