Alfijr ta rawaito Hukumar tsaro ta farin kaya (DSS) a ranar Alhamis ta yi kira ga kungiyar malaman jami’o’i (ASUU) da ta janye yajin aikin da take yi.
Alfijr Labarai
Daraktan Hukumar mai kula da jihar Yobe, Yunusa Abdulkadir ne ya yi wannan roko a Damaturu a wajen taron kwata-kwata na uku na daraktocin tsaro na jiha a shiyyar Arewa maso Gabas.
Ya ce yajin aikin da ya gurgunta ilimin jami’o’i a kasar, yana da illa ga tsaro.
“Kamar yadda muka san ASUU na bin tsari da manufa ta gaskiya, ya kamata su yi nazari sosai kan irin abubuwan da yankin Arewa maso Gabas ya yi da ya zauna sama da shekaru goma a hannun ‘yan tada kayar baya,” inji shi
Daraktan ya kuma yi kira da a samar da asibitin masu tabin hankali a Yobe domin duba matsalolin da suka biyo bayan tashin hankali da ke haifarwa.
Alfijr Labarai
Ya ce rashin yin hakan na iya haifar da munanan raunuka, wadanda za su iya haifar da wata barazana ta tsaro ga jihar da ma kasa, baya da na masu tayar da kayar baya.
A nasa jawabin, shugaban taron, Hassan Abdullahi ya ce taron zai yi nazari kan barazanar tsaro, da kuma tattauna hanyoyin da za a bi.
Abdullahi wanda shi ne Daraktan DSS na jihar Bauchi, ya lissafo matsalolin tsaro a shiyyar da suka hada da ta’addanci, garkuwa da mutane, ‘yan fashi da satar shanu.
Ya yabawa gwamnatin jihar bisa goyon baya da hadin kai ga hukumar DSS da sauran jami’an tsaro.
Alfijr Labarai
Mataimakin gwamnan jihar Alhaji Idi Gubana ya bayyana taron a matsayin wanda ya dace duba da irin kalubalen tsaro da kasar nan ke fuskanta a halin yanzu.
Ya ce duk da cewa an samu nasarori a yakin da ake da ‘yan tada kayar bayan, amma akwai bukatar a kara yin aiki don ganin an lalata ragowar ‘yan ta’addan a jihar da kuma yankin da kuma kasa baki daya.
Gubana ya ba da tabbacin cewa gwamnatin Mai Mala Buni za ta kasance a ko da yaushe tana daidaita kanta da manufofin dukkanin hukumomin tsaro a jihar
Kamfanin dillancin labarai na Najeriya (NAN) ya ruwaito cewa, muhimman abubuwan da suka faru a wajen bikin sun hada da bayar da lambar yabo ga sarakunan Fika da Damaturu, Muhammad Ibn Abali da Alhaji Shehu Hashimi, bisa rawar da suka taka a yakin da ake da ‘yan tada kayar baya.