Alfijr
Alfijr ta rawaito, Gwamnan Jihar kano Abdullahi Umar Ganduje, ya umurci Hukumar Samar da ruwan sha ta Karkara da ta gaggauta fara aiki tare da fitar da takamaiman adadin fashe-fashe na rijiyoyin burtsatse domin ganin gwamnati ta dauki matakin gaggawa.
Umurnin na kunshe ne a cikin wata sanarwa da babban sakataren yada labaran gwamnan, Abba Anwar, ya fitar ranar Lahadi.
A cewar Anwar, gwamnan ya ba da wannan umarni ne a wata ganawa ta musamman da masu ruwa da tsaki a gidan gwamnati da ke Kano a daren Asabar don magance matsalar.
Alfijr
Ganduje, wanda ya samu wakilcin mataimakinsa, Dakta Nasiru Gawuna, ya ce taron na cikin wani sabon yunkuri na sake fasalin tsarin samar da ruwan sha a jihar, musamman a kananan hukumomi takwas na jihar.
Gwamnan ya ci gaba da cewa, “An kuma umurci ma aikatar RUWASA da ta yi lissafin takamaiman wurare a fadin kananan hukumomi 44 da ke bukatar rijiyoyin burtsatse, tare da la’akari da wasu abubuwan da ke tattare da yawaitar rijiyoyin burtsatse ga muhalli.
Alfijr
Raba ruwa a cikin motoci zuwa wasu takamaiman wurare a cikin kananan hukumomin babban birnin jihar da gwamnatin jihar tare da hadin gwiwar kananan hukumomi takwas ke daukarsa a matsayin daya daga cikin mafita ta gaggawa, musamman a cikin watan Ramadan.
Ya ce taron ya gano wasu manyan kalubalen da ke kawo cikas wajen samar da ruwan sha, inda suka hada da satar waya da wasu barayi ke yi, da rashin isasshiyar wutar lantarki, da wasu ayyukan rashin kishin kasa da ke faruwa a kogin Kano da Challawa da ayyukan bata gari.
Alfijr
Gwamnan ya ba da umarnin a gaggauta tantance hadin gwiwar gwamnatin jihar da kasar Faransa, ta hanyar samar da ayyukan raya ruwa na kasar Faransa, wani shiri na taimakon miliyoyin daloli da nufin magance matsalolin da suka shafi samar da ruwa da sarrafa ruwa a jihar.
Lokacin da aka fara aikin, gwamnatin jihar ta ba da tabbacin cewa za ta kula da duk wani koma baya da ake samu a harkar.